काठमाडौं- प्रधानमन्त्री एवं नेपाली कांग्रेसका सभापति शेरबहादुर देउवाले पार्टीका शीर्ष नेताहरूलाई छलफलका लागि बालुवाटारमा बोलाएका छन्।
देउवाले आसन्न निर्वाचनमा कांग्रेसको सिट संख्याका विषयमा छलफल गर्न पार्टीका शीर्ष नेताहरूलाई बोलाएको बताइएको छ। पार्टीभित्र आन्तरिक छलफल गरेर सोहीअनुसार अरू बैठकमा प्रस्तुत हुने देउवाको तयारी रहेको कांग्रेस स्रोतले बताएको छ।
सत्ता गठबन्धनमा आबद्ध दलका शीर्ष नेताहरूबीच आउँदो निर्वाचनमा पनि तालमेल गर्ने सहमति भइसकेको छ। उनीहरूले गठन गरेको निर्वाचनको सिट बाँडफाँडसम्बन्धी कार्यदलको पहिलो बैठक आज बस्दै छ।
बैठक दिउँसो ३ बजे बालुवाटारस्थित प्रधानमन्त्रीको सरकारी निवासमा आह्वान गरिएको छ।