प्रधानन्यायाधीश महाभियोग लगाउने भए परमादेश पनि खारेज गरौँ : नरबहादुर धामी

काठमाडौं- नेकपा एमालेका सांसद नरबहादुर धामीले प्रधानन्यायाधीश चोलेन्द्र शमशेर राणामाथि महाभियोग लगाउने भए शेरबहादुर देउवालाई प्रधानमन्त्री बनाउन सर्वोच्च अदालतले दिएको आदेश पनि खारेज गर्नुपर्ने बताएका छन्। प्रधानन्यायधीश राणामाथि प्रस्ताव भएको महाभियोगमाथि प्रतिनिधि सभामा छलफलमा सहभागी हुँदै सांसद धामीले यस्तो बताएका हुन्। 

'महाभियोग लगाउने हो भने हाम्रो पनि समर्थन हुन्छ। संविधानको उल्लंघन हुने गरी किन परमादेश जारी गरियो? संसदबाट सरकार बनाऔँ,' उनले भने, 'परमादेशबाट यो सरकार बनेको हो। प्रतिपक्षको पनि साथ चाहिने हो त्यो पनि खारेज हुने विषय पनि समावेश गरौँ। परमादेशबाट आएको सरकारले गरेका सबै काम खारेज हुने विषय पनि समावेश गरौँ। आफैँमाथि कानुको ड्नडा ठटाइने डरले महाभियोगको डन्डा ठटाइयो।'

उनले परमादेश दिँदा लड्डु खाइरहेका दलले ल्याएको उक्त प्रस्ताव महाभियोग नभएर नौटंकी मात्र भएको उल्लेख गरे।