पाशुपत क्षेत्रलाई स्वच्छ राख्न पर्यटनमन्त्री श्रेष्ठको आग्रह

काठमाडौं– संस्कृति, पर्यटन तथा नागरिक उड्डयनमन्त्री जीवनराम श्रेष्ठले करोडौं हिन्दु धर्मावलम्बीको आस्थापुञ्ज पाशुपत क्षेत्रलाई सफा र स्वच्छ राख्न पशुपति क्षेत्र विकास कोषलाई निर्देशन दिएका छन्। शनिबार बिहान पशुपति मन्दिर क्षेत्रको अवलोकन तथा निरीक्षणका क्रममा गएका मन्त्री श्रेष्ठले यस्तो आग्रह गरेका हुन्।

उनले सांस्कृतिक एवं पुरातात्त्विक महत्त्वको पशुपति क्षेत्र खुला संग्रहालयको रूपमा रहेको बताउँदै सफाइमा विशेष ध्यान दिनुपर्नेमा जोड दिए। भक्तजन, तीर्थयात्री, पैदलयात्री एवं पर्यटकलाई सहज हुने गरी सबै व्यवस्था मिलाउन निर्देशन दिए।

उनले पुनर्निर्माण भइरहेका सम्पदा स्थल, विश्वरुपा मन्दिर, मृगस्थली, शेल्षमान्तक वन, विभिन्न मठ–मन्दिरलगायतको निरीक्षण गरेका थिए। मन्त्री श्रेष्ठले घाट व्यवस्थापनबारे सोधीखोजी गर्दै पानी, बिजुली तथा सार्वजनिक शौचालय व्यवस्थापन गरी सहज सेवा दिन निर्देशन दिए।

सरकारले पशुपति क्षेत्र सुधार कार्यक्रमलाई राष्ट्रिय गौरवको आयोजनाका रूपमा समावेश गरेकाले सोहीअनुसार पशुपति क्षेत्रको बृहत्तर सुधार तथा पुनर्निर्माण भइरहेको कोषका सदस्यसचिव डा. मिलनकुमार थापाले बताए।