राष्ट्रिय जनमोर्चाले थाल्यो बौद्ध पुरातत्व सहर निर्माण अभियान

बुटवल- राष्ट्रिय जनमोर्चाले रुपन्देही, कपिलवस्तु र पश्‍चिम नवलपरासीलाई बौद्ध पुरातत्व सहर निर्माणका लागि अभियान सुरुवात गरेको छ। गौतमबुद्धको जन्मभूमि लुम्बिनी र यससँग जोडिएका बौद्ध क्षेत्रहरुको परातात्विक महत्वलाई उजागर गर्दै बौद्ध सभ्यतालाई अन्तर्राष्ट्रियस्तरमा फैलाउनका लागि जनमोर्चाले बौद्ध पुरतत्व शहर अभियान सञ्चालन गर्ने निर्णय गरेको हो।

मंगलबार बुटवलमा पत्रकार सम्मेलन गरि जनमोर्चाले तीन जिल्लामा रहेका बुद्धसँग सम्बन्धित क्षेत्रको अन्वेषण, संरक्षण र उत्खनन गर्न दवाव दिने गरि महत्वकाक्षी अभियानको सुरुवात गरेको जनाएको हो। पत्रकार सम्मेलनमा जनमोर्चाका केन्द्रीय महासचिव मनोज भट्टले बुद्ध र यससँग सम्बन्धित क्षेत्रको पुरातात्विक महत्वलाई उजागर गर्नका लागि उत्खनन गर्नुपर्ने बताउँदै आफूहरुले एउटा भिजन अगाडि सारेको बताए।

उनले प्राचिन बौद्ध सभ्यताका विविध विधाहरुको अध्ययन अनुसन्धानलाई जोड दिँदै बृहत बौद्ध सहर निर्माण गर्न एउटा अवधारणा अघि सारेको बताए। 'यो हाम्रो भिजन हो, यसमा धेरै बहस गर्न सकिन्छ,’ उनले भने, 'एक प्रकारले यो सपना नै हो।’ लुम्बिनी र बौद्ध दर्शनका ज्ञाता प्राध्यापक डा. गितु गिरीले पुरातात्विक शहर निर्माण गर्ने अभियान सकरात्मक भएको बताए।

पत्रकार सम्मेलनमा बुटवल बहुमुखी क्याम्पसका सहप्राध्यापक लिलाबहादुर केसीले बुद्ध सर्किटहरुको सयौं क्षेत्रहरुमा उत्खननको आवश्यकता रहेको बताए। लुम्बिनी र तिलौराकोट दुबैको उत्खननबाटै इतिहास पत्ता लागेको उल्लेख गर्दै कपिलवस्तु, रुपन्देही र नवलपरासीका बौद्ध सभ्यताका सयौं स्थानहरुमा उत्खनन आवश्यक रहेकोले यस्तो अभियान थालिएको सचिव हिमलाल पुरीले बताए।