रूपन्देही- प्युठानको स्वर्गद्वारी नगरपालिका-४ भ्यागुतेमा शनिबार जीप दुर्घटना हुँदा एक जना महिलाको मृत्यु भएको छ।
स्वर्गद्वारीबाट भिङ्ग्रीतर्फ आउँदै गरेको लु३च ३५३ नम्वरको जीप दुर्घटना हुँदा रुपन्देहीको मायादेवी गाउँपालिका-३ निवासी ३२ वर्षिया गुडिया ठाकुरको घटनास्थलमै मृत्यु भएको जिल्ला प्रहरी कार्यालय प्युठानका प्रमुख प्रहरी नायव उपरीक्षक सत्यनारायण थापाले जानकारी दिए।
प्रहरीका अनुसार दुर्घटनामा १४ जना घाईते भएका छन्। त्यसमध्ये ९ जनाको अबस्था गम्भीर छ। भिङ्ग्रीमा प्राथमिक उपचारपछि घाईतेहरुलाई बुट्वल रिफर गरिएको थापाले बताए।
रुपन्देहीको सिद्धार्थ नगरपालिका र मायादेवी गाउँपालिकाका स्थानीय जीप रिजर्व गरेर शुक्रबार तिर्थयात्राका लागि स्वर्गद्वारी आएका थिए। जीपमा १७ जना सवार थिए।