झण्डै दोब्बरले बढे शुक्लाफाँटामा पाटेबाघ

कञ्चनपुर- शुक्लाफाँटा राष्ट्रिय निकुञ्जमा पाटेबाघको सङ्ख्या एक वर्षमै झण्डै दोब्बरले बढेर ३६ पुगेको छ।

निकुञ्ज कार्यालयका निमित्त प्रमुख संरक्षण अधिकृत मनोज ऐरका अनुसार १६ पोथी र १२ भाले छन् भने आठ वटा डमरु छन्। बाघको बासस्थानमा सुधारसँगै आहारा प्रजातिको पर्याप्तता, पानीको व्यवस्था, चोरी शिकारी पूर्णरुपमा नियन्त्रण हुनुका साथै मध्यवर्ती क्षेत्रका बासिन्दाको सहयोग र समन्वयका कारण बाघको सङ्ख्या बढेको उनको भनाइ छ।

सन् २०२२ भित्रै बाघको सङ्ख्या दोब्बर पार्ने प्रतिबद्धता पुरा भएको उनले बताए। गत वर्षको माघ २९ देखि २१ दिनसम्म स्वचालित क्यामेराको सहायताले बाघ गणनाको कार्य गरिएको थियो।

शुक्लाफाँटा–लालझाडी–जोगबुढा कम्प्लेक्समा दुई किलोमिटर लम्बाइ र दुई किलोमिटर चौडाइ भएको दुई सय ६० ग्रीडमा विभाजन गरी बाघ गणनाको कार्य गरिएको निकुञ्ज कार्यालयले जनाएको छ। थोरै क्षेत्रफलमा धेरै बाघको घनत्व पाइने क्षेत्रका रुपमा निकुञ्ज परिचित रहेको छ।

निकुञ्जमा सन् २००८ देखि बाघ गणनाको कार्य हुँदै आएको छ। सन् २००९ मा निकुञ्जमा बाघको सङ्ख्या आठ वटा मात्रै रहेको थियो। त्यो सङ्ख्या बढेर अहिले ३६ पुगेको हो।

अघिल्लो वर्ष निकुञ्जमा १९ वटा पाटेबाघ फेला परेका थिए। सन् २०१३ मा १७, सन् २०१८ मा १६ वटा पाटेबाघ देखा परेका थिए। निकुञ्जमा दुई वर्षको अवधिमा दुई वटा बाघ मरेको अवस्थामा फेला परेका थिए। यो निकुञ्ज ३०५ वर्ग किलोमिटर क्षेत्रफलमा फैलिएको छ।