आरिफको अर्धशतक : श्रीलंकालाई १ सय ९५ रनको लक्ष्य

काठमाडौं-आरिफ सेखको अर्धशतकीय पारीसँगै नेपालले श्रीलंका आर्मी स्पोर्ट्स क्लबलाई १ सय ९५ रनको लक्ष्य प्रस्तुत गरेको छ । 

टस जितेर पहिले ब्याटिङ रोजेको नेपालले ४८.४ ओभर मा सबै विकेट गुमाउदै १ सय ९४ रनको जोडेको थियो । नेपाली राष्ट्रिय क्रिकेट टोलीले आज (बुधबार) श्रीलंका आर्मी स्पोर्ट्स क्लबसँग पहिलो अभ्यास खेल खेलेका हो । 

नेपालका लागी चौथो ब्याट्सम्यानका रुपमा मैदान छिरेका आरिफ सेखले नटआउट रहँदै अर्धशतकीय पारी खेले । आरिफले धरमराएको नेपाली ब्याटिङलाई उकास्ने प्रयास गरे । उनले सर्वाधिक ८९ रन जोडे । आरिफले ११८ बल खेल्दै ८९ रन जोडेका थिए । 

त्यस्तै आजका कप्तान ज्ञानेन्द्र मल्ल २१ रनमा आउट हुँदा, विनोद भण्डारी र बसन्त रेग्मीले समान १६–१६ रन जोडे । रोहित कुमार पौडेलले १२ तथा ओपनर सुवास खकुरेलले १० रन जोड्नबाहेक अन्य ब्याट्सम्यानले दोहोरो अंक जोड्न सकेनन् । आज पनि नेपाली ब्याट्सम्यान त्यति चल्न सकेनन् । 

राष्ट्रिय टिमका नियमित कप्तान पारस खड्का र स्पिनर बलर सन्दिप लामिछाने भने मैदानमा थिएनन् । यतिखेर एसिया कप क्रिकेटको छनोट खेल्ने तयारीमा रहेको नेपाली राष्ट्रिय क्रिकेट टिम अभ्यासका लागि सोमबार नै श्रीलंका पुगेको थियो ।