समाजवादी केन्द्र बनाउने सहमति भइसक्यो, सबै क्षेत्रमा उम्मेदवार उठाउँछौँ : वर्षमान पुन

काठमाडौं- नेकपा माओवादी केन्द्रका नेता वर्षमान पुनले समाजवादी केन्द्र गठन गर्ने सहमति भइसकेको बताएका छन्। आइतबार दिउँसो पत्रकारहरूसँग कुरा गर्दै पुनले यस्तो बताएका हुन्। उनले आगामी निर्वाचनमा सबै निर्वाचन क्षेत्रमा समाजवादी केन्द्रले उम्मेदवार उठाउने समेत बताएका हुन्। 

‘माओवादी केन्द्र, नेकपा एकीकृत समाजवादी, जनता समाजवादी पार्टी, बाबुराम भट्टराई र वामदेव गौतमबीच समाजवादी केन्द्र बनाउने सहमति भइसकेको छ,’ पुनले भने, ‘१६५ निर्वाचन क्षेत्रमै उम्मेदवारी दिने हाम्रो तयारी छ। कांग्रेससँग आवश्यकताका आधारमा केही ठाउँमा तालमेल हुन सक्छ।’

चुनावअघि दल नै एक हुने सम्भावना भने नभएको उनको भनाइ छ। समाजवादी मोर्चा बनेपछि देशमा मुख्य दुई राजनीतिक शक्ति हुने पुनको दाबी थियो। ‘परम्परागत शक्तिको नेतृत्व कांग्रेसले गर्छ। प्रगतिशील शक्तिको नेतृत्व समाजवादी मोर्चाले गर्छ,’ पुनले भने, ‘एमाले कता जाने भन्ने उसले निर्णय गर्ने कुरा हो।’