झलनाथको प्रश्न- एसपीपी अस्वीकार गर्दै पत्र लेख्न कसले रोक्यो?

काठमाडौं- नेकपा (एकीकृत समाजवादी)का सांसद एवं पूर्वप्रधानमन्त्री झलनाथ खनालले एसपीपी अस्वीकार गर्दै पत्र नलेखेको भन्दै सरकारले आक्रोश व्यक्त गरेका छन्। बिहीवार प्रतिनिधि सभाको बैठकमा बोल्दै सांसद खनालले यस्तो बताएका हुन्। 

'यतिबेला हाम्रो देशमा गम्भीर समस्या पैदा हुँदै गएका छन्। राष्ट्रियतासामु अनेक प्रकारका खतरा मडारिएका छन्। मन्त्रिपरिषद्ले एसपीपी (अमेरिकी सरकारको स्टेट पार्टनरसिप प्रोग्राम) अस्वीकार गर्छौँ भनेर सरकारले निर्णय गरेको एक महिनाभन्दा बढी भइसकेको छ। तर अहिलेसम्म के कारणले पत्र लेख्न सकिएको छैन?,' सरकारप्रति प्रश्न गर्दै उनले भने, 'यो हाम्रो देशको क्याबिनेटभन्दा बाहिर कतातिर छ हाम्रो कार्यकारी अधिकार? कार्यकारी अधिकार भएको क्याबिनेटले निर्णय गरिसकेपछि अब फेरि पनि अरु कसैले रोक्न सक्छ यो देशमा? के कारणले रोकिँदैछ? म गम्भीररतापूर्वक सरकारलाई प्रश्न उठाउन चाहन्छु।'

उनले युक्रेन-रुस युद्धका कारण अर्थव्यवस्थामा गम्भीर संकट पैदा भएको उनको भनाइ थियो। यसले मूल्यवृद्धि र विभिन्न वस्तुको उपलब्धतामा संकट आएको समेत उल्लेख गरे।