एसपीपीमा भाग नलिने पत्र तत्काल पठाउन रुलिङ गरियोस् : माओवादी

काठमाडौं– सत्ता गठबन्धनको दल नेकपा माओवादी केन्द्रले अमेरिकाको स्टेट पार्टनरसिप प्रोग्राम (एसपीपी) मा नेपालले भाग नलिने पत्र अमेरिकालाई तत्काल पठाउन सदनबाट रुलिङ हुनुपर्ने माग गरेको छ। 

सभामुखले परराष्ट्र मन्त्रालयलाई यस्तो रुलिङ गर्नुपर्ने माग उनको छ। प्रतिनिधिसभाको बिहीबारको बैठकको विशेष समयमा बोल्दै माओवादी केन्द्र संसदीय दलका प्रमुख सचेतक देव गुरुङले एसपीपी सम्झौता खारेजी गर्ने भन्ने पत्र तत्काल पठाउनका लागि परराष्ट्र मन्त्रलायलाई रुलिङ गर्न सभामुखसँग माग गरे। 

‘एसपीपी खारेजीसम्बन्धी मन्त्रिपरिषद्को निर्णयका सन्दर्भमा अहिलेसम्म परराष्ट्र मन्त्रालयले पत्रचार नगरेकोमा र थप छलफल गरेर मात्र अघि बढाउने परराष्ट्र मन्त्रालयले भनेकोमा मन्त्रिपरिषद्को निर्णय विपरीत भयो,' उनले भने, 'त्यसैले एसपीपीलाई अस्वीकार गर्ने पत्र तत्काल पठाउन परराष्ट्र मन्त्रालयलाई रुलिङ गर्न सभामुखसँग माग गर्दछु।’

परराष्ट्र मन्त्रालयले बुधबार आयोजना गरेको नियमित पत्रकार सम्मेलनमा मन्त्रालयकी प्रवक्ता सेवा लम्सालले उक्त पत्र पठाउनेबारे छलफल भइरहेको बताएकी थिइन्।