काठमाडौंबाट महेन्द्रनगर हुँदै भारत लैजान लागेकी युवतीको उद्धार

कञ्चनपुर- मोबाइल बनाउने बहाना बनाएर काठमाडौंबाट महेन्द्रनगर पुर्‍याइएकी युवतीको बुधबार उद्धार गरिएको छ। 

काठमाडौंबाट भगाइएकी युवतीलाई नेपालगन्ज हुँदै महेन्द्रनगर पुर्‍याएर भारत लैजान लागेको अवस्थामा महेन्द्रनगर बसपार्कबाट उद्धार गरिएको हो।

महेन्द्रनगर बसपार्कबाट उदयपुरकी १६ वर्षीया युवतीलाई गैरसरकारी संस्था साहसी महिला नेपालले उद्धार गरी सुरक्षित गृहमा राखेको छ। युवतीलाई भगाएर ल्याउने मुगुका वसन्त लावडलाई प्रहरीको जिम्मा लगाइएको छ।

काठमाडौंका सवारी चालक लावडले युवतीलाई मोबाइल बनाउने बहानामा महेन्द्रनगरसम्म ल्याएका हुन्।

काठमाडौंमा बस्दै आएका युवती र उनको परिवारबीच चिनजान रहेछ र त्यसका आधारमा मोबाइल बनाउने भनेर नेपालगन्जसम्म ल्याएको पाइएको प्रहरीले जनाएको छ।

युवतीले केही भन्न नसकेकाले उनलाई युवकले झुक्याएर भारत लैजान लागेको हुन सक्ने प्रहरीको अनुमान छ।