पार्टी दर्ता गर्न निर्वाचन आयोग पुगे वामदेव

काठमाडौं– गत असार १४ मा नेकपा एकता राष्ट्रिय अभियान नामक पार्टी खोलेका वामदेव गौतम दल दर्ताका लागि निर्वाचन आयोग पुगेका छन्। 

पार्टीमा वामदेव गौतम संयोजक हुने गरी निर्वाचन आयोगमा दल दर्ताका लागि प्रक्रिया अघि बढाइएको हो। 

पार्टीको नाम नेकपा (एकता राष्ट्रिय अभियान) हुनेछ भने यसका संयोजक वामदेव गौतम रहने गरी दर्ता प्रक्रिया अघि बढेको हो।

निर्वाचन आयोगमा उक्त दलको निवेदनको दर्ता नम्बर ६४ रहेको पार्टी प्रचार विभाग प्रमुख निमकान्त पाण्डेले बताए। 

उनका अनुसार ३ वटा चुनाव चिह्न आयोगमा प्रस्ताव गरिएको छ। ‘३ वटा नाम हामीले प्रस्ताव गरेका छौं,’ उनले भने, ‘आयोगले कुन चिह्न दिन्छ, त्यही कायम हुन्छ।’

कुन–कुन नाम आयोगमा प्रस्ताव गरिएको भन्नेबारे उनले खुलाएनन्। ७५ जना केन्द्रीय सदस्य हुने गरी गत १४ असारमा गौतमले पार्टी घोषणा गरेका थिए। 

राष्ट्रिय सभाका सांसदसमेत रहेका गौतमले तत्कालीन नेकपा विभाजित भएपछि वाम एकताका लागि छुट्टै अभियान सञ्चालन गर्दै आएका थिए। पार्टीको प्रमुख उद्देश्य नेपालका वामपन्थी दल एकीकृत गर्ने रहेको बताएका थिए।