स्वदेश फर्कियो नेपाली क्रिकेट टोली

काठमाडौं– आईसीसी लिग २ अन्तर्गत एकदिवसीय त्रिकोणामक सिरिजका लागि स्कटल्यान्ड भ्रमण सकेर नेपाली राष्ट्रिय क्रिकेट टोली मंगलबार स्वदेश फर्किएको छ। 

नेपाली राष्ट्रिय क्रिकेट टोली कप्तान सन्दीप लामिछानेले जे सोचेर स्कटल्यान्ड भ्रमण गरिएको थियो, त्यसमा सफल हुन नसकिएको बताए।

‘हाम्रा गल्ती सुधार गर्दै बाँकी १६ खेल जित्न जरुरी छ। खेलअघि राम्रो टिमसँग प्रशिक्षण गर्न पाएका थियौं। युवा खेलाडी छन्, नयाँ कन्डिसन भएका कारण पनि केही गाह्रो भएको हो। सबै च्यालेन्ज पार गर्न सक्यांै भने अर्को लेभलमा जान सक्छौं,’ उनले भने। 

सन्दीपले आफूलाई कप्तानभन्दा पनि खेलाडीको रूपमा आगाडि राख्ने बताए। ‘टिम हार्नु भनेको म आफैं हार्नु हो। टोली राम्रो छ तर हामी क्षमताअनुसार खेल्न सकेका छैनौं। सबैले आफ्नो तर्फबाट राम्रो खेल्ने प्रयास गर्नुपर्छ’ उनले भने। ब्याटिङको समस्या पहिलाबाटै रहेकाले स्कटल्यान्ड भ्रमणमा पनि दोहोरिएको उनको भनाइ छ।

नेपालले आईसीसी लिग–२ अन्तर्गत त्रिकोणात्मक एकदिवसीय सिरिजमा नामिबिया र स्कटल्यान्डसँग ४ खेल खेलेको थियो। सिरिजका ४ खेलमध्ये ३ खेल जित्ने लक्ष्यमा स्कटल्याण्ड भ्रमणमा गएको नेपाली टोलीले एक खेलमा मात्र जित निकालेको थियो।

नेपाल नामिबियासँग ६३ र ४० रनले पराजित भएको थियो। स्कटल्याण्डलाई एक खेलमा ५ विकेटले हराउँदै ऐतिहासिक जित निकालेको थियो। अर्को खेलमा भने ८ विकेटको फराकिलो हार बेहोरेको थियो।