राजुले जिते एसियन सुगठनमा काँस्य

काठमाडौं- नेपाली शारीरिक सुगठन खेलाडी राजु राईले माल्दिभ्समा भइरहेको ५४औं एसियन शारीरिक सुगठन तथा फिजिक स्पोर्टस् अन्तरगत फिटनेस फिजिकमा तेस्रो स्थान प्राप्त गरेका छन्। टिम व्यवस्थापक संघका उपाध्यक्ष दिनेश राजभण्डारीले राईले काँस्य जितेको जानकारी दिएका हुन्।

राजुले १७० सेमीसम्मको समूहमा तेस्रो स्थान प्राप्त गरेका हुन्। २४ राष्ट्र सहभागी उक्त विधामा राजुले स्पाइडरम्यान प्रदर्शन तथा फिजिकतर्फ पदक जित्न सफल भएका हुन्। यसअघि पनि नेपाली खेलाडीले एशियन शारीरिक सुगठनमा पदक प्राप्त गरिसकेका छन्।

सोही प्रतियोगिताका दौरान शारीरिक सुगठन खेलको विकासमा योगदान पुर्‍याएवापत विश्व शारीरिक सुगठन तथा फिजिकल फिटनेस महासंघले नेपाल शारीरिक सुगठन तथा फिजिकल फिटनेसका अध्यक्ष राजेशबाबु श्रेष्ठलाई 'डिस्टिङ्गुइस्ड अवार्ड' ले सम्मान गरेको समेत मालदिभ्सबाट उपाध्यक्ष भण्डारीले जानकारी गराए।

प्रतियोगतामा राजुसहित सुजिता मानन्धर र उमेश राई पनि सहभागिता जनाउन गएका छन्। सुजिताले सोमबार आफ्नो फिजिक अन्तरगतको विधमा प्रतिस्पर्धा गर्दैछिन्। यस्तै उमेश राईले बुधबार प्रतिस्पर्धा गर्दैछन्।

प्रतियोगितामा नेपालका तर्फबाट निर्णायकको भूमिका निर्वाह गर्न अन्तराष्ट्रिय निर्णायक एवं संघका वरिष्ठ उपाध्यक्ष विजयलाल कायस्थ, नानी काजी डंगोल र लक्ष्मण महत पनि माल्दिभ्समा छन्। 

नेपालले सन् २०२३ मा ५५औं एसियन शारिरीक सुगठन तथा फिजिक स्पोर्टस् आयोजना गर्ने भएको छ।