बीजेपी अध्यक्षलाई भेटे प्रचण्डले, आजै स्वदेश फर्किंदै

काठमाडौं– भारत भ्रमणमा रहेका नेकपा माओवादी केन्द्रका अध्यक्ष पुष्पकमल दाहाल प्रचण्डले भारतीय जनता पार्टीका अध्यक्ष जेपी नड्डासँग भेटवार्ता गरेका छन्। नयाँ दिल्लीस्थित भाजपाको केन्द्रीय कार्यालयमा आइतबार बिहान प्रचण्ड र नड्डाबीच कुराकानी भएको हो।

स्वकीय सचिव रमेश मल्लका अनुसार प्रचण्डलाई सत्तारुढ दल भारतीय जनता पार्टीले मुख्यालयमा स्वागत गरेको थियो। नड्डासँगको भेटमा भारतीय विदेशमन्त्री एस जयशंकर समेत सहभागी थिए। त्यसक्रममा अध्यक्ष नड्डाले ‘नो बीजेपी अर्थात भाजपालाई जान्नुस्’ अभियानबारे ब्रिफिङ गरेके  बताइएको छ।

शुक्रबार नयाँ दिल्ली पुगेका प्रचण्डले शनिबार विदेशमन्त्री एस जयशंकर, सुरक्षा सल्लाहकार अजित डोभाललगायत उच्चस्तरीय भेटघाट गरेका थिए। बीजेपी अध्यक्ष नड्डाकै निमन्त्रणमा प्रचण्ड नयाँदिल्ली पुगेका हुन्। उनी आज स्वदेश फर्कने कार्यक्रम छ।