एमालेको दाबी : प्रधानमन्त्री देउवाको एक वर्षे कार्यकाल समयको बर्बादी

काठमाडौं– प्रमुख प्रतिपक्षी नेकपा एमालेले प्रधानमन्त्री शेरबहादुर देउवाको एक वर्षे कार्यकाल समयको बर्बादी मात्रै रहेको बताएको छ।

प्रधानमन्त्री देउवाले यसअघि असार २९ मा एक वर्षे कार्यकालको ४३ बुँदे सफलताका पुलिन्दा सार्वजनिक गरेका थिए। 

प्रधानमन्त्री देउवा नेतृत्वको सरकारको एक वर्षे कार्यकालबारे आफ्नो धारणा सार्वजनिक गर्दै एमालेले भनेको छ, ‘सरकारको नीति तथा कार्यक्रम, बजेट, संसद्मा प्रधानमन्त्रीले गरेको सम्बोधन र नीति तथा कार्यक्रम र बजेटको कार्यान्वयन गठबन्धन सरकारले एक वर्ष समयको बर्बादीमा मात्र गरेको छ।’

संविधानको रक्षा र कार्यान्वयन, लोकतन्त्र सुदृढीकरण, संघीय प्रणालीको सुदृढीकरण, जनजीविका र राष्ट्रियताको सवाल, अन्तर्राष्ट्रिय सम्बन्ध, सुशासन र भ्रष्टाचार नियन्त्रणमा देउवा सरकार असफल भएको एमालेको ठहर छ।

‘संविधानमा उल्लेख गरिएको स्वास्थ्य र शिक्षाजस्तो मौलिक हक कार्यान्वयन गरी समाजवादको आधार तय गर्ने सवालमा सरकारले छेउ टुप्पो नै फेला पार्न सकेको छैन,’ पत्रकार सम्मेलनमा एमाले सचिव योगेश भट्टराईले भने।