बार्साको जितसँगै मेस्सीको नाममा ६ हजार औं गोल 

एजेन्सी- स्पेनिस ला लिगा फुटबलमा साबिकको बिजेता बार्सिलोनाले विजयी सुरुवात गरेको छ । शनिबार राति भएको नयाँ सिजनको पहिलो खेलमा डिपोर्टिभो अलाभेसलाई ३-० ले हराउदै बार्सिलोनाले सिजनको शुखद सुरुवात गरेको हो । 

घरेलु मैदानमा भएको खेलमा बार्सिलोनालाई जित दिलाउन कप्तान लियोनल मेस्सीले दुई र फिलिपे कौटिन्होले एक गोल गरे । पहिलो हाफ गोलरहित बराबरीमा सकिएको खेलको दोस्रो हाफमा तीन गोल गर्दै बार्सिलोनाले सहज जित निकालेको थियो ।

खेलको ६४ औं मिनेटमा फ्रिकिकबाट गोल गर्दै कप्तान मेस्सीले बार्सिलोनालाई सुरुवाती अग्रता दिलाए । खेलको ८३ औं मिनेटमा कौटिन्होले बार्सिलोनाको अग्रता दोब्बर बनाए । त्यसपछि खेलको इन्जुरी समयमा कप्तान मेस्सीले व्यक्तिगत दोस्रो गोल गर्दै बार्सिलोनालाई ३-० को सहज जित दिलाए ।

अलाभेसविरुद्धको ३-० को जितसंगै बार्सिलोनाले क्लब इतिहासमा ६ हजार गोलको कोशेढुंगा पार गरेको छ । बार्सिलोनाको ६ हजारौं गोल कप्तान मेस्सीको नाममा रहन गएको छ । मेस्सीले फ्रिकिकबाट पहिलो गोल गर्दै बार्सिलोनाको ६ हजारौं गोल पुरा गरेका हुन्  ।

आठ बर्षअघि पनि मेस्सीले नै बार्सिलोनाको ५ हजारौं गोल गरेका थिए । स्पेनिस ला लिगा अन्तर्गत नै शनिबार राति भएको अर्को खेलमा रियल सोसिडाडले भिल्ला रियललाई २-१ गोल अन्तरले हराएको छ । रियल सोसिडाडको जितमा विलियन जोसे र जुवान्मी ले एक एक गोल गरे । भिल्लाका जेरार्ड मोरिनोले एक गोल फर्काए ।