एसियाडमा आज नेपालले पाकिस्तानसँग खेल्दै

इन्डोनेसियामा जारी एसियन गेम्स अन्तर्गत पुरुष फुटबलमा नेपालले आज (आइतबार) पाकिस्तानसँग प्रतिस्पर्धा गर्दैछ । समूह चरणका अघिल्ला दुई खेलमा पराजित नेपाली यू–२३ टोलीले समूह चरणको अन्तिम खेलमा पाकिस्तानसंग खेल्न लागेको हो ।  नेपाल र पाकिस्तानबीचको खेल नेपाली समय अनुसार अपरान्ह साढे तीन बजे शुरु हुनेछ ।

अघिल्ला दुई खेलमा पराजित एको नेपालले पाकिस्तानलाई हराएर दोस्रो चरण पुग्ने सम्भावना कायम राख्न चाहन्छ । पाकिस्तानलाई हराएर नेपाल तेस्रो हुने टिममध्ये उत्कृष्ट चारमा रहदै दोस्रो चरण पुग्नेछ । समूह चरणको ६ समूहबाट उत्कृष्ट चार टोलीले दोस्रो चरणको यात्रा तय गर्नेछन् । तर, नेपाललाई पाकिस्तानविरुद्ध जित निकाल्न सहज भने हुनेछैन ।  नेपालविरुद्ध मैदान उत्रदा पाकिस्तान पनि जितको खोजीमा हुनेछ ।

नेपाल र पाकिस्तान फुटबलमा नौलो प्रतिद्वन्द्वी भने होईन् । सिनियर टोलीमा नेपालले पाकिस्तानविरुद्ध अहिलेसम्म ५ खेलमा जित निकालेको छ । यस्तै पाँच खेलमा बराबरी खेल्दा पाँच खेल नै हारेको छ ।

यसअघि नेपाल समूह चरणको पहिलो खेलमा जापानसंग १-० र भियतनामसंग २-० ले पराजित भएको थियो । यो समूहमा नेपाल र पाकिस्तान जितबिहीन रहेको छ । जापान र भियतनाम भने दोस्रो चरणमा प्रवेश गरिसकेका छन् ।