बैतडीमा कारागारमै राष्ट्रिय परिचयपत्र विवरण संकलन

बैतडी- जिल्ला कारागार बैतडीका कैन्दीबन्दीको कारागारमै राष्ट्रिय परिचयपत्रका लागि विवरण संकलन गरिएको छ।

शुक्रबार गरिएको विवरण संकलन कार्यमा कारागारमा रहेका १७ कैदीबन्दी र १ सुरक्षाकर्मीको परिचयपत्रका लागि विवरण संकलन गरिएको कम्प्युटर प्राविधिक बालकृष्णप्रसाद भट्टले जानकारी दिए। कारागारभित्रै ८७ कैदीबन्दी रहेका भए पनि सबैसँग आवश्यक कागजात नरहेको तथा कसैले पहिला नै बनाएकाले १७ जनाको मात्रै विवरण संकलन गरिएको जनाइएको छ।

राष्ट्रिय परिचयपत्र तथा पञ्जीकरण विभागले गरेको परिपत्रअनुसार नै कारागारभित्रै कैदीबन्दीको विवरण संकलन गरिएको छ। 

कैदीबन्दीलाई बाहिर ल्याउँदा सुरक्षा चुनौती हुने भएकाले कारागारभित्रै टोली बनाएर विवरण संकलनको काम गरिएको जिल्ला प्रशासन कार्यालय बैतडीका सूचना अधिकारी खगेन्द्र भारतीले जानकारी दिए।

बैतडीमा विक्रम संवत् २०७७ असोज पहिलो हप्तादेखि राष्ट्रिय परिचय पत्र विवरण संकलनको काम शुरू भएकोमा हालसम्म ८३ हजार ३८३ जनाको विवरण संकलन भइसकेको छ। शुरूमा जिल्ला प्रशासन कार्यालयमा विवरण संकलनको काम भएको थियो भने हाल अभियानकै रूपमा वडास्तरमै काम भइरहेको प्रमुख जिल्ला अधिकारी सुरेश पन्थीले जानकारी दिए।