यु-१५ साफ च्याम्पियनसिपमा नेपाल चौंथो

काठमाडौं- नेपाल यु-१५ महिला साफ च्याम्पियनसिपमा चौंथो भएको छ। शनिबार तेस्रो स्थानको लागि भएको खेलमा आयोजक भुटानसँग पेनाल्टी सुटआउटमा ४-३ गोलले पराजित हुँदै नेपालले चौथो स्थानमा चित्त बुझाएको हो।

चाम्लिङथाङ रंगशालामा भएको प्रतिस्पर्धात्मक खेलको निर्धारित समयको खेल २-२ गोलको बराबरीमा सकिएपछि खेलको निर्णय पेनाल्टी सुटआउटबाट लिइएको हो। प्रतिस्पर्धात्मक खेलमा नेपाललाई तेस्रो स्थान दिलाउन वैकल्पिक खेलाडी चन्द्रा भण्डारीले दुई गोल गरिन्।

नेपाल खेलको दोस्रो मिनेटमा नै पछि परेको थियो। डेकी याङडनले गोल गर्दै भुटानलाई शुरुवाती अग्रता दिलाए। पहिलो हाफसम्म १-० पछि परेको नेपालले दोस्रो हाफको शुरुमै बराबरी गोल फर्काउन सफल भयो। दोस्रो हाफको शुरुमै मैदान छिरेकी चन्द्राले बराबरी गोल फर्काइन्।

चन्द्राले नै ५५ औं मिनेटमा गोल गरेपछि नेपालले खेलमा २-१ को अग्रता लिन सफल भएको थियो। तर, ६६ औं मिनेटमा यासी विधाले गोल गर्दै खेललाई २-२ गोलको बराबरीमा पुर्‍याएकी थिइन्।  त्यसपछि थप गोल हुन नसक्दा खेल पेनाल्टी सुटआउटमा पुगेको थियो।