खेट्टी मल्लकोे मृत्यु हृदयघातबाट, भिसेरा रिपोर्ट पर्खंदै प्रहरी

काठमाडौं– बैतडीको मेलौलीमा मृत फेला परेकी महिलाको भेजाइनल स्वाब प्रहरीले परीक्षणका लागि काठमाडौं पठाएको छ। डडेल्धुराको भागेश्वर गाउँपालिका–३ लामीकाँडा घर भएकी ३६ वर्षीया खेट्टी मल्ल साउन ८ गते बैतडीको मेलौली नगरपालिका–७ ल्वाथलीमा मृत फेला परेकी थिइन्।

मल्लको मृत्यु कसरी भयो भन्ने पुष्टि गर्नका लागि भेजाइनल स्वाब र भिसेरा केन्द्रीय प्रहरी विधिविज्ञान प्रयोगशाला काठमाडौं पठाइएको इलाका प्रहरी कार्यालय पाटनका इञ्चार्ज प्रहरी निरीक्षक राजेश शाहीले जानकारी दिए। 

‘मल्लको मृत्युको कारण पत्ता लगाउन भेजाइनल स्वाब, मुटु, कलेजो, फोक्सोको टुक्रा तथा भिसेरा परीक्षणका लागि काठमाडौं पठाएका छौं,’ उनले भने, ‘स्वाब र भिसेराकोे रिपोर्टपछि मात्रैै मृत्युकोे कारण खुल्छ।’

केशरपुर प्राथमिक स्वास्थ्य केन्द्रमा गरिएको पोष्टमार्टम रिपोर्टअनुसार मल्लको मृत्यु हृदयघातका कारण भएको हो। मल्ल मृत फेला परेको ल्वाथलीमा उनकोे झोला र छाता फेला परेको थियोे भने शरीरमा कुनै पनि घाउचोट थिएन।

‘प्राथमिक स्वास्थ्य केन्द्रले हृदयघातका कारण मृत्यु भएको पुष्टि गरे पनि मृतकसँग त्यस दिन सम्पर्कमा आएकाहरुको कल डिटेल अध्ययन गरिरहेका छौ, हाम्रो अनुसन्धान जारी छ। थप कुरा खुल्छ कि भनेरै स्वाब काठमाडौं पठाएका हौं,’ शाहीले भने। साउन ७ गते खेट्टी मल्ल बैतडीको मेलौली–५ शेरा माइत जान भनी हिँडेकी थिइन्।