काठमाडौं महानगरले स्थानीय रक्सीको प्रवर्द्धन गर्ने

काठमाडौं– काठमाडौं महानगरपालिकाले नेवार जातिको परम्परागत मदिराको प्रवद्र्धन गर्ने भएको छ। महानगरका नवनिर्वाचित मेयर बालेन्द्र शाहले आज नगर सभामा  महानगरको आर्थिक वर्ष २०७९–०८० को नीति तथा कार्यक्रम पेश गर्दै उक्त घोषणा गरेका हुन्।

त्यसैगरी महानगरले खुलामञ्चमा भूमिगत पार्किङको सम्भाव्यता खोजिने नीति लिएको छ। 

‘काठमाडौं महानगरपालिका वडा नम्बर ११ खुलामञ्चसँगैको जग्गामा रिभर्स बोरिङसहितको भूमिगत पार्किङको सम्भाव्यता अध्ययन गरिनेछ,’ नीतिमा उल्लेख छ।

महानगरभित्र पार्किङ क्षेत्रको पहिचान गर्न अध्ययन टोली गठन गर्ने समेत नीति लिइएको छ। महानगरमा चल्ने सबै सवारी साधनलाई जिपीएस ट्र्याकिङ गर्ने र सार्वजनिक सवारीमा विद्युतीय माध्यमबाट भाडा तिर्न सकिने व्यवस्था गर्ने समेत नीति लिइने मेयर शाहको भनाइ छ। 

सबै सार्वजनिक यातायातलाई एउटै छातामुनि सञ्चालन गर्न पहल र फुटपाथमा पसल राख्न निषेध गर्ने नीति समेत लिइने मेयर शाहले उल्लेख गरे।