गठबन्धनका नेताहरूबीच एसपीपीबारे छलफल गर्न सर्वदलीय बैठक डाक्ने सहमति

काठमाडौं– विवादको भूमरीमा परेको अमेरिकी स्टेट पार्टनरसिप प्रोग्राम (एसपीपी) बारे छलफल गर्न सर्वदलीय बैठक बोलाउन सत्तागठबन्धनमा आबद्ध शीर्ष नेताहरूबीच सहमति जुटेको छ। सत्ता गठबन्धनका शीर्ष नेताबीच आइतबार प्रधानमन्त्री निवास बालुवाटारमा भएको छलफलमा गठबन्धनका नेताहरूले प्रधानमन्त्री शेरबहादुर देउवालाई सर्वदलीय बैठक बोलाएर एसपीपीबारे यथार्थ जानकारी गराउन आग्रह गरेका थिए। 

नेताहरूको सुझावमा प्रधानमन्त्री देउवा सहमत भएको नेकपा एकीकृत समाजवादीका अध्यक्ष माधवकुमार नेपालले बताए।  ‘स्टेट पार्टनरसिप प्रोग्रामबारे अहिले अन्योल छ। यसको वास्तविकता के हो भन्नेमा सर्वदलीय बैठक बोलाएर छलफल गरौं र यथार्थ जनतामाझ ल्याऊँ भनेर प्रधानमन्त्रीजीलाई भनेका छौ’, अध्यक्ष नेपालले भने, ‘उहाँले हुन्छ भन्नुभएको छ।’

गठबन्धनमा आबद्ध नेताहरूका अनुसार एक–दुई दिनभित्रै सर्वदलीय बैठक बोलाएर एसपीपीबारे छलफल गरी वास्तविकता बाहिर ल्याइनेछ। अध्यक्ष नेपालसहित माओवादी केन्द्रका अध्यक्ष पुष्पकमल दाहाल, समाजवादीकै नेता झलनाथ खनाल, जसपा अध्यक्ष उपेन्द्र यादवलगायतका नेता आइतबार प्रधानमन्त्री देउवासँग छलफलका लागि बालुवाटार पुगेका छन्।

एसपीपी सम्झौताको सत्तापक्ष र प्रतिपक्ष दुवैतिरबाट विरोध भइरहेको छ। अमेरिकाले नेपालले एसपीपी नचाहने हो भने पत्र लेखेर रद्द गर्न सक्ने बताइसकेको छ। कतिपय नेताहरूले सरकारलाई पत्र लेखेर एसपीपी सम्झौता अस्वीकार गर्न सुझावए पनि सरकारले अहिलेसम्म त्यसबारे बोलेको छैन। 

आइतबार सत्ता गठबन्धनका शीर्ष नेताहरूबीच भएको छलफलमा एसपीपीका अलवा आगामी मंसिरमा हुने प्रदेश र प्रतिनिधिसभा निर्वाचनबारे छलफल भएको बताइन्छ।