काठमाडौं– नेपाल क्रिकेट संघ (क्यान) ले मलेसिया जाने नेपाली महिला राष्ट्रिय क्रिकेट टिमको विदाइ गरेको छ। एसीसी महिला टी–ट्वान्टी च्याम्पियनसिप खेल्नका लागि मलेसिया जाने टिमलाई क्यानले आज काठमाडौंमा विदाइ गरेको हो।
मलेसियामा आयोजना हुने एसीसी महिला टी–ट्वान्टी च्याम्पियनसिपका लागि प्रशिक्षक जगत टमाटाले हिजो सोमबार नेपाली टिमको घोषणा गरिसकेका छन्। रुबिना क्षेत्रीको कप्तानीमा प्रशिक्षक जगत टमाटाले नेपाली टिमको घोषणा गरेका हुन्।
१५ सदस्यीय महिला टिमको प्रारम्भिक टोलीमा रहेका १९ खेलाडीबाट छानेर अन्तिम टोलीको घोषणा भएको हो। जसमा मनिषा उपाध्याय पहिलो पटक टिममा परेकी छन्।
अब मलेसियामा च्याम्पियनसिप आउँदो यही १७ बाट सुरु हुँदैछ। नेपाल च्याम्पियनसिपको समूह बीमा रहेको छ। यो समूहमा नेपालसहित हङकङ, कुवेत, भुटान र बहराइन छन् भने समूह एमा आयोजक मलेसियासँगै युएई, ओमान,कतार र सिंगापुर छन्।
समूह चरणको खेलपछि शीर्ष दुई टोलीले सेमिफाइनलमा स्थान बनाउने छन्। त्यस्तै, च्याम्पियनसिपको फाइनल पुग्ने दुई टोलीले महिला टी ट्वान्टी एसिया कप क्रिकेटमा छनोट हुनेछ।