मेडिकल काउन्सिल कमिसनतन्त्रमा फसेको छ : सांसद चौधरी, काउन्सिल भन्छ– उहाँको छोरा लाइसेन्स परीक्षामा तीनपल्ट फेल हुनुभएको थियो

काठमाडौं– नेकपा एमालेकी सांसद गंगा चौधरी सत्गौवाले मेडिकल काउन्सिलमा कमिसनको खेल भएको आरोप लगाएकी छन्।

प्रतिनिधिसभाको बैठकमा उनले यस्तो आरोप लगाएकी हुन्। मेडिकल काउन्सिलमा भइरहेको कमिसनको खेलले डाक्टरहरु लाइसेन्स परीक्षामा फेल भइरहेको उनको दाबी छ।

उनले भनिन्, ‘एउटै तहको परीक्षामा बिहान एउटा, दिउँसो अर्को र बेलुकै अर्कै खालको पेपर आउँछ। दुःख गरेर डाक्टर बनेकाहरु फेल हुन्छन्। ती पीडितको दुःखमा मेडिकल काउन्सिल रमाइरहेको छ।’

सांसद चौधरीले संसद्मा आफ्नै पीडा बोलेकी हुन्। मेडिकल काउन्सिल स्रोतका अनुसार उनका छोरा मेडिकल काउन्सिलको नाम दर्ता (लाइसेन्स) परीक्षामा फेल भएका थिए, त्यो पनि तीन पटकसम्म। 

बंगलादेशमा पढेर आएका चौधरीले लाइसेन्स परीक्षामा पटकपटक नाम निकाल्न नसकेपछि सांसद चौधरीले नाम निकालिदिन भन्दै दबाब दिँदै आएकी थिइन्। छोराको नाम ननिस्केपछि गंगाले काउन्सिललाई आरोप लगाएको दुखेसको काउन्सिलका अधिकारीहरुको छ।