स्पेन र नर्वेको जित, स्विट्जरल्यान्डसँग पोर्चुगल पराजित

काठमाडौं- यूईएफए नेसन्स लिगअन्तर्गत आइतबार रातिको खेलमा स्पेन, स्विटजरल्यान्ड र नर्वेले जित निकालेको छ। 

नर्वेको उल्लेवाल रंगशालामा भएको खेलमा नर्वेले पाहुना टिम स्विडेनलाई ३-२ ले हराएको हो। नर्वेलाई जित दिलाउनका लागि इर्लिङ हाल्यान्डले दुई गोल गरेका छन्। त्यस्तै, अलेक्जेन्डर सरलोठले पनि एक गोल गरे। यता स्विडेनका लागि इमिल फोर्सबर्ग र भिक्टोर ग्योकेरेसले समान १-१ गोल फर्काएका थिए।

यो समूह एचको खेल हो। सोहि समूहको अर्को खेलमा भने स्लोभेनिया र सर्बियाले २-२ को बराबरी खेलेका छन्। यो बराबरीसँगै सात अंक बनाएको सर्बिया तालिकाको दोस्रो स्थानमा छ भने चार खेलबाट १० अंक बनाएको नर्वे शीर्षस्थानमा छ। चार टिम रहेको समूहको पुछारमा भने स्लोभेनियाँ रहेको छ।

यता समूह बीको खेलमा भने स्पेनले चेक गणतन्त्रलाई २-० ले हराएको छ। स्पेनका लागि कार्लोस सोलर र पाबलो सराबियाले गोल गरेका थिए। सोहि समूहको अर्को खेलमा भने पोर्चुतगले हार बेहोरेको छ।

आइतबार राति स्विट्जरल्यान्डको घरेलु मैदानमा सम्पन्न खेलमा फरवार्ड क्रिस्टियानो रोनाल्डोविना उत्रिएको टिमले घरेलु टिमसँग १-० को हार बेहोरेको हो।

खेलको पहिलो मिनेटमै ह्यारिस सेफेरोविचले गोल गरेका थिए। त्यो गोललाई बचाउँदै स्विट्जरल्यान्डले जित निकालेको हो।

यो जितका बाबजुद स्विटजरल्यान्ड समूहको पुछार अर्थात् चौथो स्थानमा छ। पोर्चुगल भने दोस्रो स्थानमा छ। चार खेलबाट आठ अंक बनाएको स्पेनले भने समूहको शीर्षस्थान ओगटेको छ।