मलेसियन प्रिमियर लिग क्रिकेटमा सागर उत्कृष्ट ब्याट्सम्यान

एजेन्सी-नेपाली क्रिकेटर सागर पुन र आसिफ शेखसम्मिलित क्वालालम्पुर मलेसियन प्रिमियर लिग क्रिकेटको च्याम्पियन बनेको छ । आइतबार भएको फाइनलमा केवाङसान युनिभर्सिटीलाई ७ विकेटले पराजित गर्दै क्वालालम्पुर च्याम्पियन बनेको हो ।

किन्नरा ओभलमा केवाङसान युनिभर्सिटीले दिएको १ सय २ रनको लक्ष्य क्वालालम्पुरले २५ ओभर ३ बलमा मात्र ३ विकेट गुमाएर पुरा गर्‍यो । क्वालालम्पुरको जितमा नेपालका आसिफले अविजित ३३ तथा सागरले १० रन जोडे । अघिल्ला दुई खेलमा शतक बनाएका सागर फाइनलमा भने सस्तैमा आउट हुन पुगेका थिए । 

यस्तै क्वालालम्पुरको लागि कप्तान अहमेद फैजले ४५ रन जोड्दा भिरणदिप सिंहले १५ रन जोडे । केवाङसान युनिभर्सिटीका मोइनुल इस्लामले २ तथा नाज्रिल रहमानले १ विकेट लिए । यसअघि टस जितेर पहिले ब्याटिङ गरेको केवाङसान युनिभर्सिटीले २६ ओभरमा अलआउट हुँदै १०१ रन बनाएको थियो ।

उसका लागि इमामुल मुस्ताकिमले २८, कप्तान फिक्री माक्रमले १२ तथा चे वान जलाटीले १० रन जोडे । नेपाली ब्याट्सम्यान सागर पुन प्रतियोगितामा सर्वाधिक रन जोड्ने खेलाडी बने । प्रतियोगिताकै उत्कृष्ट ब्याट्सम्यान बनेका सागरले १० खेलमा ४ सय ५२ रन जोडे । सागरले ७ सय मलेसियन रिंगेट प्राप्त गरे । बलिङतर्फ सागरले ९ विकेट लिएका थिए ।