शपथग्रहण समारोहमा माला लगाएनन् बालेनले

काठमाडौं– काठमाडौं महानगरपालिकाका नवनिर्वाचित मेयर बालेन्द्र (बालेन) शाहले पद तथा गोपनियताको शपथ ग्रहण गरेका छन्।

निर्वाचन सम्पन्न भएको १८ दिनपछि मेयर शाहले आज निर्वाचित भएको प्रमाणपत्र ग्रहण गर्नुका साथै शपथ ग्रहण गरेका हुन्। 

उनलाई प्रमुख निर्वाचन अधिकृत राजकुमार खतिवडाले शपथ ग्रहण गराएका थिए। अधिकृतसँग नेपालीमा शपथ लिएपछि शाहले नेवारी भाषामा छुट्टै शपथ पनि लिएका थिए। 

आफूले शपथ लिएपछि मेयर शाहले उपमेयर सुनिता डंगोल, वडाध्यक्ष, वडा सदस्यहरुलाई पनि शपथ गराएका छन्। बालेनले नेपालीमा पढेको शपथ डंगोलले नेवारीमा उल्था गरेर पढेकी थिइन्।  

दुई दिन लगातार सार्वजनिक बिदा परेका कारण निर्वाचन परिणाम आएको तीन दिनपछि मात्र जनप्रतिनिधिले शपथ लिएका हुन्। 

यसैबीच, नवनिर्वाचित मेयर शाहले सपथ ग्रहण समारोहमा माला लगाउन अस्वीकार गरेका छन्। राष्ट्रिय सभागृहमा आयोजित कार्यक्रममा अन्य नवनिर्वाचित जनप्रतिनिधिहरूले माला लगाउँदा उनको घाँटी भने खाली थियो। मेयर निर्वाचित भएको भोलिपल्ट ओखरपौवास्थित डम्पिङ साइटमा पुगेका शाहले काठमाडौंको फोहोरको समस्या समाधान नगरेसम्म माला र खादा नलगाउने प्रतिवद्धता जनाएका थिए। सोही अनुरुप उनले माला ग्रहण गर्न नचाहेका हुन्।

कार्यक्रममा उपस्थित बालेनकी पत्नी सविना काफ्लेले भने माला लगाएकी छन्।