काठमाडौंका मेयर बालेनले लिए शपथ

काठमाडौं– काठमाडौं महानगरपालिकाका नवनिर्वाचित जनप्रतिनिधिले शपथ लिएका छन्। आज बिहान राष्ट्रिय सभागृहमा आयोजित समारोहमा शाहले शपथ ग्रहण गरेका हुन्।

काठमाडौं महानगरका मुख्य निर्वाचन अधिकृत राजकुमार खतिवडाले मेयर शाहलाई पद तथा गोपनीयताको शपथ ग्रहण गराएका हुन्।

त्यसअघि मुख्य निर्वाचन अधिकृत खतिवडाले मेयर, उपमेयरसहित सबै वडाका प्रतिनिधिलाई प्रमाणपत्र वितरण गरेका थिए।

दुई दिन लगातार सार्वजनिक बिदा परेकाले निर्वाचन परिणाम आएको तीन दिनपछि मात्र उनले पद तथा गोपनियताको शपथ लिएका हुन्। राष्ट्रिय सभागृहमा शपथग्रहण गरेपछि उनले आजै महानगरको कार्यालयमा पुगेर जिम्मेवारी सम्हाल्नेछन्।

गत वैशाख ३० गते सम्पन्न निर्वाचनबाट काठमाडौंको मेयरमा स्वतन्त्रबाट बालेन शाह चुनिएका हुन्। त्यस्तै उपमेयरमा नेकपा एमालेकी सुनिता डंगोल निर्वाचित भएकी छन्। पदभार ग्रहणपछि बोर्ड बैठक बसेर मेयर शाहले पहिलो निर्णयमा हस्ताक्षर गर्ने कार्यक्रम छ।