म ६८ वर्ष पुग्न लागे, वृद्धभत्ता लिन्न : पूर्वप्रधानमन्त्री भट्टराई

काठमाडौं- पूर्वप्रधानमन्त्री तथा जनता समाजवादी पार्टी, नेपालका संघीय परिषद् अध्यक्ष डा. बाबुराम भट्टराईले वृद्धभत्ता दिने उमेर घटाएकोमा आपत्ति जनाएका छन् ।

आर्थिक वर्ष २०७९/०८० को बजेटमा रूपान्तरकारी ढंगका योजना आउन नसकेको भन्दै उनले विरोध जनाएका हुन् । संसदमा बजेट पेस भइसकेपछि सञ्चारकर्मीसँग संक्षिप्त प्रतिक्रिया दिँदै अध्यक्ष भट्टराईले रूपान्तरणकारी ढंगका योजना आउन नसकेको बताएका हुन् ।

उनले ६८ वर्षमा वृद्ध भत्ता दिने घोषणाको विरोध गर्दै आफूले पनि वृद्धभत्ता नलिने जनाएका छन्। 'एउटा कुरा मैले भन्नपर्छ। म पनि अब ६८ वर्ष पुग्दैछु। बृद्धभत्ता दिने उमेर घटाउनु आवश्यक थिएन,' उनले भने।

छरिएका सामाजिक सुरक्षा भत्ताभन्दा एकीकृत प्रकारको सामाजिक सुरक्षा आउनुपर्ने भट्टराईको धारणा छ। गरिब देशको वृद्धभत्ता ग्रहण गरेर जनतामाथि बोझ थोपर्न आफूले नचाहेको उनको भनाइ छ।