इंग्लिस प्रिमियर लिगको पहिलो खेलमा म्यानचेस्टर युनाइटेड विजयी

इंग्ल्यान्ड- शुक्रबारबाट शुरु भएको इंग्लिस प्रिमियर लिग फुटबल अर्न्तगत सिजनको पहिलो खेलमा म्यानचेस्टर युनाइटेडले विजयी शुरुवात गरेको छ।

घरेलु मैदान ओल्डट्राफोर्डमा भएको लिगमा युनाइटेडले लेस्टर सिटीलाई २-१ ले पराजित गर्दै विजयी शुरुवात गरेको हो । युनाइटेडको जितमा पल पोग्वा र लुका साले गोल गरे भने लेस्टरका जेमी भार्डीले एक गोल फर्काएका थिए।

युनाइटेडले खेलको तेस्रो मिनेटमा नै अग्रता बनाउन सफल भएको थियो। पल पोग्वाले पेनाल्टीमार्फत गोल गर्दै अग्रता दिलाउन सफल भएका थिए । आफैले डि–बक्समा बल क्रस गर्दा लेस्टरका अमारटेले ह्यान्ड गरेपछि युनाइटेडले पेनाल्टीको मौका पाएको थियो। 

पहिलो हाफमा १ गोल मात्र भएको खेलमा दोस्रो हाफमा दुई गोल भए । दोस्रो हाफमा युनाइटेडमाथि लेस्टर हावी बनेको थियो। तर, ८३ औं मिनेटमा लुका सा ले गोल गरेपछि युनाइटेडले २–० को अग्रता बनायो। माटाले दिएको चिप पासमा लुकाले सहजै गोल गरेका थिए। 

इन्जुरी समयमा जेमी भार्डीले गोल गरेपनि त्यो लेस्टरको जितका लागि पर्याप्त बनेन। युनाइटेडले २–१ ले खेल आफ्नो पक्षमा पार्न सफल भयो । प्रिमियर लिग अन्र्तगत आज (शनिबार) ६ खेल हुदैछ।