'बालेनहरू'ले राज्य गरे दलको अस्तित्व समाप्त हुँदै जान्छ : झलनाथ खनाल

काठमाडौं- नेकपा एकीकृत समाजवादीका नेता झलनाथ खनालले बालेनहरूले राज्य गरे राजनीतिक दलको अस्तित्व समाप्त हुने बताएका छन्। आगामी आर्थिक वर्षका लागि सरकारले ल्याएको नीति तथा कार्यक्रममाथिको छलफलमा सहभागी हुँदै नेता खनालले यस्तो बताएका हुन्। 

दलहरू संविधानको मर्मअनुसार अघि नबढ्दा राजनीतिक दललाई संकट पर्ने उनको भनाइ छ। 'संविधानको मर्मअनुसार अघि बढेनौँ भने इतिहासमा पछि पर्छौँ। र धेरै बालेनहरू जन्मनेछन्। बालेनहरूले राज्य गर्नेछन्। दलको अस्तित्व समाप्त हुँदै जानेछ,' नेता खनालले संसदमा भने। 

उनले यो संसदको अन्तिम भएको भन्दैमा संविधानको मर्म र दिशा निर्देशनलाई छोड्न नमिल्ने उल्लेख गरे।

नीत तथा कार्यक्रममा भूमिसुधारको कुरा नभएको समेत उल्लेख गरे। 'नेपालको भूमिसुधार गर्ने भनेको भूमिसम्बन्धी तथ्यांक अद्यावधिक गर्नुपर्‍यो। सिंगो देशको कुनै पनि टुक्रा क्लिक गर्दा हेर्न सक्ने बनाउनुपर्‍यो। हाम्रो भूसम्पत्तिलाई न्यायोचित रूपमा वितरण गर्न आवश्यक छ।'