काठमाडौंमा पाँचवटा वडाको गणना बाँकी, बालेनको फराकिलो अग्रता

काठमाडौं– काठमाडौं महानगरपालिकाका २७ वटा वडाको मतगणना सकिएको छ। वडा नम्बर १ देखि १२ सम्म र १८ देखि ३२ सम्मको मतगणना सकिएको छ।

अहिले वडा नम्बर १३, १४, १५, १६ र १७ वडाको मतगणना जारी  छ। हालसम्म १ लाख ६६ हजार ३१३ मतगणना हुँदा मेयर पदमा १ लाख ३९ हजार ९६५ सदर मत परेको छ। ६ हजार ५३२ मत पूर्ण रुपमा बदर भएको छ।

मेयरमा सुरुदेखि नै अग्रता लिएका स्वतन्त्र उम्मेदवार बालेन शाह फराकिलो मतान्तरका साथ अहिले पनि अग्रस्थानमा छन्। नेपाली कांग्रेसकी सिर्जना सिंह दोस्रो र नेकपा एमालेका केशव स्थापित तेस्रो स्थानमा छन्।

बालेनले ५४ हजार २१२ मत प्राप्त गर्दा सिंहले ३४ हजार १८० र केशव स्थापितले ३३ हजार ६०९ मत ल्याएका छन्।

चौथो स्थानमा रहेका स्वतन्त्र उम्मेदवार सुमन सायमीले १० हजार ९६३ मत प्राप्त गरेका छन्। राष्ट्रिय प्रजातन्त्र पार्टीका मेयर उम्मेदवार मदनदास श्रेष्ठले ५ हजार ८१ मत प्राप्त गरेका छन्।

विवेकशील साझा पार्टीकी मेयर उम्मेदवार समीक्षा बाँस्कोटाले ५९५ मत पाएकी छन्।