गोलकिपर किरण आज थाइल्यान्ड जाँदै

काठमाडौं–नेपाली राष्ट्रिय टोलीका गोलकिपर किरण चेम्जोङ आज (बुधबार) थाइल्यान्ड जाँदै छन् । एसियाड र साफ च्याम्पियनसिपका लागि नेपाली टोली १० दिनको विशेष प्रशिक्षण र दुई अभ्यास खेलका लागि गत शुक्रबार थाइल्यान्ड प्रस्थान गरेको थियो । 

तर, भिसा समस्याका कारण किरण टिमसँग जान पाएका थिएनन् । भिसा समस्या समाधान भएको र बुधबार ११ बजेपछि थाइल्यान्ड जाने तय भएको गोलरक्षक किरणले जानकारी दिए ।

माल्दिभ्सको टिसी स्पोर्टसबाट व्यवसायिक फुटबल खेलिरहेको किरण गत बुधबार नै काठमाडौं आएका थिए । थाइल्यान्ड प्रस्थान गरेसँगै किरण शुक्रबार थाइल्यान्डको यु–२३ टिमसँगको खेलमा उपलब्ध हुनेछ । 

तर, उक्त खेलमा टिममा रहने या नरहने प्रशिक्षकको हातमा रहने किरणले बताएका छन् । उक्त अभ्यास खेलपछि नेपाली टोली एसियाडका लागि जाकार्ता प्रस्थान गर्नेछन् । किरण एसियाड टोलीका कप्तान हुन् ।