प्रदेश १ का मुख्यमन्त्रीको जिल्लामा नेकपा एस 'निल'

काठमाडौं– प्रदेश नम्बर एकका मुख्यमन्त्री राजेन्द्र राईको गृहजिल्ला भोजपुरमा नेकपा एकीकृत समाजवादी निल भएको छ। जिल्लाका सबै ९ वटा पालिकाको मतपरिणाम सार्वजनिक भइसकेको छ। 

९ पालिकाका कुनै पनि प्रमुख पद (प्रमुख, उपप्रमुख, वडाध्यक्ष)मा नेकपा एसले जित निकाल्न सकेन। जिल्लाका केही पालिकामा सत्तारुढ गठबन्धनका दलबीच तालमेल पनि भएको थियो। तालमेलका आधारमा नेकपा एसले भोजपुर नगरपालिकामा उपाध्यक्ष र टेम्के मैयुङ गाउँपालिकामा उपाध्यक्ष पाएको थियो। तर, दुवै उम्मेदवार पराजित हुन पुगे।

भोजपुर नगरपालिकामा रुख चुनाव चिन्ह लिएर उपमेयर लडेकी ममिता राई एमालेकी निर्मला शेर्पासँग पराजित भइन्। यस्तै टेम्के मैयुङमा उपाध्यक्ष लडेकी इन्द्रावती राई नेकपा एमालेकै रमादेवी राईसँग पराजित भइन्। मुख्यमन्त्रीको गृह नगर षडानन्द नगरपालिकाको मेयरमा एमालेका सुरेन्द्र उदास निर्वाचित भएका छन्।