विराटनगरको मतगणना सुरु

विराटनगर- विराटनगर महानगरपालिकाको मतगणना सुरु भएको छ। बिहान ८ बजेबाट गणना सुरु गर्ने भनिए पनि वर्षाका कारण प्रतिनिधिहरू समयमा आउन नसक्दा प्रभावित भएपछि साढे १० बजे मात्र सुरु गरिएको हो।

विराटनगर-७ स्थित आदर्श माविमा मतगणना सुरु भएको मुख्य निर्वाचन अधिकृतको कार्यालय विराटनगरले जनाएको छ। विराटनगरको १९ वटा वडामा शुक्रबार भएको मतदानमा ८९ हजार ६ सय ७८ मत खसेको छ। 

विराटनगरमा ४३ हजार २ सय ४६ मत भने नखसेको कार्यालयका सूचना अधिकारी हेमबहादुर बुढाथोकीले जानकारी दिए। 

महानगरमा १ लाख ३३ हजार १ सय ४२ मतदाता रहेका थिए। गणनाका क्रममा अप्रिय घटना हुनसक्ने सम्भावनालाई मध्यनजर गर्दै कार्यालयले मतगणनास्थलको ६ वटा कोठामा सिसिटिभीसहित तारले घेरा बनाएको छ।

विराटनगरमा सत्ता गठबन्धनबाट कांग्रेसका नागेश कोइराला मेयर उम्मेदवार छन्। एमालेबाट सागरकुमार थापा मेयर उम्मेदवार छन्।