काठमाडौं उत्रेपछि पारसले भने- 'चमात्कारिक सफलता' (भिडियो)

काठमाडौं–एक दिवसीय क्रिकेटमा ऐतिहासिक जित हासिल गरेको नेपाली टोली काठमाडौं आइपुगेको छ । 

नेपालले नेदरल्यान्डमा भएको एकदिवसीय सिरिज खेलमा नेदल्यान्डसँग एक एकको बराबरी खेल्दै सुखद शुरुवात गरेको थियो । 

नेपाल आइपुगेका नेपाली टोलीका कप्तान पारश खड्काले नेपालको एकदिवसीय खेलमा सुखद सुरुवात गरेको भन्दै आगामी दिनमा क्रिकेटको विकासमा नेपालले धेरै प्रगति गर्ने बताए । 

भिडियो हेर्नुहोस् 

उनले नेपाली क्रिकेट समर्थकको चाहानालाई मध्यनजर गर्दै नेपाली टोलीको प्रस्तुती अझै राम्रो बनाउने बताए । 

नेपालको व्याटिङ यसपाली पनि राम्रो नचलेको बताउँदै खेलमा निखार ल्याउन धेरै सुधारको आवश्यकता रहेको बताए । 

खेलको शुरुवाती राम्रो भएपनि पूरा खेल अवधिभर एकैनासको प्रस्तुती गर्न नसकेको भन्दै उनले खेल जित र हार दुवैका लागि हुने भएपनि नेपाल सँधै जित्नका लागि खेल्ने बताए । 

एसीसी एशिया कप छनोट प्रतियोगिता आगामी भदौ ११ देखि २२ गतेसम्म मलेसियामा हुँदैछ । नेपाली टोली बेलायतको लड्समा त्रिकोणात्मक टी–२० शृङ्खला र नेदरल्याण्ड्समा दुई खेलको एकदिवसीय शृङ्खला खेलेर स्वदेश फर्किएको हो । 

नेदरल्याण्ड्स जानुअघि नेपाली टोलीले बेलायतको लड्समा आयोजक मेरिलेबोन क्रिकेट क्लब (एमसिसी)सँग टि-२० खेलेको थियो । उक्त खेलमा नेपाल विजयी भएको थियो । नेदरल्याण्ड्ससँगको एकदिवसीय शृङ्खलामा पहिलो खेलमा नेपाल ५५ रनले पराजित भएको थियो भने दोस्रो खेलमा एक रनले विजयी भएको थियो । 

सन्दीप वेस्ट इण्डिजतर्फ 

नेपाली टिमका युवा स्पिनर सन्दीप लामिछाने क्यारेबियन प्रिमियर लिग (सिपिएल) खेल्न आइतबार वेस्ट इण्डिज गएका छन् । नेदरल्याण्ड्सबाट उनी वेस्ट इण्डिज गएका हुन् । सन्दीप सिपिएल टिम सेन्ट किट्स एण्ड नभिस पाट्रिओट्ससँग आवद्ध भएका थिए । सिपिएल यही साउन २२ गतेदेखि भदौ ३१ गतेसम्म हुनेछ । सिपिएलमा ६ टोली सहभागी हुनेछन् ।