ओलम्पिक फुटबलको स्वर्ण पदक ब्राजिललाई

काठमाडौं- टोक्यो ओलम्पिक २०२० अन्तर्गत पुरुष फुटबलको स्वर्ण पदक ब्राजिलले जितेको छ।

शनिबार भएको फाइनल खेलमा स्पेनलाई २-१ गोलले पराजित गर्दै ब्राजिलले स्वर्ण पदक जितेको हो।

निर्धारित ९० मिनेटमा दुवै टोलीले १-१ गोल गरेपछि खेल अतिरिक्त समयतर्फ धकेलिएको थियो। खेलको १०८औं मिनेटमा ब्रजिलका लागि माल्कमले गोल गर्दै स्वर्ण पदक सुनिश्चित गराए।

त्यसअघि खेलको पहिलो हाफको थप गरिएको दोस्रो मिनेटमा म्याथ्युस कुन्हाले गोल गर्दै ब्रजिललाई अग्रता दिलाएका थिए। खेलको ६१ औं मिनेटमा स्पेनका माइकल ओयारर्जाबलले गोल गर्दै खेललाई बराबरीमा ल्याए।

त्यसपछि निर्धारित ९० मिनेटसम्म कुनै टोलीबाट गोल नभएपछि खेल अतिरिक्त समयतर्फ गएको थियो।

२०१६ को रियो ओलम्पिकमा घरेलु मैदानमै स्वर्ण जितेको ब्राजिलले लगातार दोस्रोपटक स्वर्ण जितेको हो। त्यतिबेला उसले निकट प्रतिद्वन्दी जर्मनीलाई हराएर स्वर्ण पदक जितेको थियो।