ओली नेतृत्वको चुनावी गठबन्धन प्रतिगामी : रामचन्द्र पौडेल

काठमाडौं- नेपाली कांग्रेसका वरिष्ठ नेता रामचन्द्र पौडेलले स्थानीय चुनावका लागि कांग्रेसको नेतृत्वमा भएको गठबन्धनलाई परिवर्तनका पक्षधर शक्तिबीचको पवित्र भन्दै एमाले नेतृत्वमा भएको गठबन्धन पुरातनवादी र प्रतिगामी भएको आरोप लगाएका छन्।

तनहुँको भानु नगरपालिकामा कांग्रेसका उम्मेदवारको परिचयात्मक कार्यक्रममा वरिष्ठ नेता पौडेलले सत्तारुढ पाँच दलीय गठबन्धन परिवर्तनका पक्षधर शक्तिबीचको पवित्र गठबन्धन भएको बताएका हुन्। 

उनले लोकतन्त्र र संविधान जोगाएर मुलुकलाई विकासको बाटोमा अगाडि बढाउनका लागि सत्तारुढ दलका बीचमा गठबन्धन भएको दाबी गरे। उनले सत्तारुढ दलका बीचमा मात्र नभएर एमालेको नेतृत्वमा पनि चुनावी गठबन्धन भएको भन्दै पौडेलले केपी ओली नेतृत्वको गठबन्धन पुरातनवादी प्रतिगामी भएको बताए। 

पौडेलले कांग्रेस स्पष्ट धारणाका साथ चुनावमा होमिएको बताउँदै गठबन्धन र कांग्रेसको नीति र रणनीतिका बारेमा कन्फ्युजन नहुन नेता कार्यकर्तालाई आग्रह गरे। ‘चुनावमा जाँदा जनतामा कन्फ्युजन हुने कुरा बोल्न हुदैन। विकास र राजनीतिलाई लिएर जान कांग्रेस चाहन्छ,' उनले भने।

गाउँको विकास र लोकतन्त्र कांग्रेसले जोगाउने उनले बताए। उनले कांग्रेसले विदेश पलायन हुने अवस्था रोक्नका लागि गाउँमा आम्दानी गाउँमै रोजगारीको अभियान थाल्न लागेको बताए।