एशियन गेम्सको बक्सिङ छनोटमा मिनु र ललिताको जित

काठमाडौं- नेपाल बक्सिङ संघले आगामी सेप्टेम्बरमा चीनमा हुन गइरहेको १९ औं एशियन गेम्सका लागि यही अप्रिल २७ देखि अप्रिल ३० तारिखसम्म अधिराज्यव्यापी प्रारम्भिक बक्सिङ छनोट खेल सुरु गरेको छ।

प्रारम्भिक छनोट खेलमा बुधबार फ्लाई वैट ५१ किलो महिलातर्फ त्रिभुवन आर्मी क्लबकी मिनु गुरुङले नेपाल बक्सिङ क्लबका दीवाना शेर्मालाई नक आउटको आधारमा पराजित गरिन्।

त्यसै गरी सोही तौल समूहमा आर्मीकै ललिता महर्जनले एपिएफका निता गोसाईलाई अंकको आधारमा पराजित गरिन्। फ्लाई वैट तौल समूहमा भएको अर्को खेलमा नेपाल प्रहरीका रिता धरलाले बागमती प्रदेशका देनिका राईलाई अंकको आधारमा पराजित गरिन भने बाग्मती प्रदेशकी सुस्मा तामाङले बाग्मती प्रदेश 'ए' कै अस्मिता दुवाललाई युनानिमस डिसिजनका आधारमा पराजित गरिनन्।

त्यसै गरी महिला वेन्टमवैट तौल समुहमा बागमती प्रदेशका हेमा राईले बागमती प्रदेश 'ए' कै स्वस्तिका लाई स्पिलट डिसिजनका आधारमा पराजित गरिन्।

पुरुषका खेलहरुमा ५२ केजी तौल समूहमा बागमती प्रदेशका खेलाडी लक्ष्मण राईले आर्मीका खेलाडी जयन्त मैनालीलाई र नेपाल प्रहरीका खेलाडी चन्द्र बहादुर थापाले बागमती प्रदेशका खेलाडी रविन थापाललाई क्रमश ३:२ र ५:० अंकको आधारमा जित हात पारे। त्यसैगरी ५७ केजी तौल समूहमा नेपाल आर्मी बी का खेलाडी पुरन सुनुवारलाई नेपाल आर्मी 'ए' का खेलाडी ईन्द्र बहादुर सुनारले वाक ओभरका आधारमा जिते।

६३ केजी तौल समूहमा गण्डकी प्रदेशका खेलाडी सागर परियारलाई नेपाल आर्मी ए का खेलाडी लालु आले मगरले ५:० अंकको आधारमा र सोही तौल समूहमा बागमती प्रदेश ए का सुलभ मालिलाई बागमती प्रदेशका निशान दासले ४:१ अंकको आधारमा जित हासिल गरे।

त्यसैगरी ७५ केजी तौल समूहमा बागमती प्रदेशका खेलाडी बिनिस राईलाई ललितपुरका खेलाडी साजन थिङ तामाङले ३:२ अंकको आधारमा र लुम्बिनी प्रदेशका खेलाडी विकास राना मगरलाई बागमती प्रदेशका खेलाडी सनिल शाहीले ५:० अंकको आधारमा जित हात पारे।