सातामा दुई दिन बिदा दिने सरकारको निर्णय

काठमाडौं- सरकारले सातामा दुई दिन सार्वजनिक बिदा दिने निर्णय गरेको छ। सरकारका प्रवक्ता एवम् सञ्चार तथा सूचना प्रविधिमन्त्री ज्ञानेन्द्रबहादुर कार्कीले आगामी जेठ १ गतेदेखि लागू हुनेगरी शनिबार र आइतबार दुई दिन बिदाको निर्णय भएको जानकारी दिएका हुन्। 

सातामा दुई दिन बिदा दिने निर्णयसँगै बिहान ९ः३० बजेदेखि र साँझ ५ः३० बजेसम्म कार्यालय समय तोकिएको छ। यद्यपि सरकारले यसलाई परीक्षणका रूपमा मात्र कार्यान्वयन गर्ने तयारी गरेको छ।

पेट्राेलियम पदार्थको बढ्दो खपतलाई कम गर्ने उद्देश्यले सातामा दुई दिन सार्वजनिक बिदा निर्णय गरिएको बताइएको छ। नेपालले ठूलो मात्रामा पेट्रोलियम पदार्थको आयात गर्दै आएको छ। बढ्दो पेट्रोलियमको आयात र खस्कँदो निर्यातले शोधानान्तर घाटा बढ्दै गएको छ।

यस्तै विदेशी मुद्राको सञ्चितिमा पनि चाप परेपछि सरकारले सतर्कता अपनाएको हो। सरकारले बुधबारबाट नै लागू हुने कार, महँगा मोटरसाइकल, कुरमुरेलगायतका विभिन्न ३७ वस्तुको आयातमा प्रतिबन्ध लगाएको छ।