एमालेका वडाअध्यक्ष रमेश नेपालसहित नौ जनाविरुद्ध उजुरी दर्ता

बुटवल- एमालेबाट बुटवल-२ मा उम्मेदवारी दर्ता गराएका वडाअध्यक्षका उम्मेदवार रमेश नेपालविरुद्ध उजुरी परेको छ।

२०७६ साल भदौ २१ गते नेपालले आत्महत्या गर्ने प्रयास गरेर अपराध गरेको तथा अख्तियारमा मुद्दा रहेको भन्दै उजुरी परेको छ। 

आत्महत्यालाई गर्नु अपराध सरह हुने भन्दै स्थानीय तह निर्वाचन ऐन २०७३ अनुसार वडाअध्यक्ष नेपालविरुद्ध उजुरी परेको हो। 

२०७४ सालको निर्वाचनमा नेपाल एमालेबाट वडाअध्यक्षमा निर्वाचित भएका थिए। उनले सोमबार पुन: एमालेबाटै दोस्रो कार्यकालका लागि अध्यक्षमा उम्मेदवारी दिएका हुन्।

बुटवल उपमहानगरमा नेपालसहित पाँच जना वडाअध्यक्षविरुद्ध उजुरी परेको निर्वाचन कार्यालय रुपन्देहीले जनाएको छ। निर्वाचन कार्यालयका अनुसार नेपाली कांग्रेसबाट बुटवल ११ को वडाअध्यक्षमा उम्मेदवारी दिएका जीतबहादुर मल्ल प्रगतीनगर खानेपानी तथा सरसफाई संस्था तथा विद्युत सहकारी संस्थामा अध्यक्ष भएको भन्दै उजुरी परेको हो। 

यसैगरि कांग्रेसबाटै वडा नम्बर ४ मा उम्मेदवारी दिएका नरिश्वर शर्मालाई टोल विकास संस्थाको अध्यक्ष भएको भन्दै उजुरी परेको छ। 

त्यसैगरि अन्य वडाअध्यक्ष र सदस्यहरुलाई टोल समिति, बस्ती विकास समिति र आर्थिक दुरुपयोग गरेको भन्दै उजुरी परेको हो। बुटवल निर्वाचन अधिकृतको कार्यालले मंगलबार साँझ ५ बजेसम्म उजुरी गर्ने समय तोकेको थियो।

स्थानीय तह निर्वाचन ऐन २०७३ मा को परिच्छेद–४ को १२ र १३ अनुसार निर्धारित योग्यता नपुगेको भए उम्मेदवारी दिएकाविरुद्ध उजुरी दिन सकिने व्यवस्था छ।

परेका उजुरी उपर बुधबार र बिहीबार जाँझबुझ गर्ने बुटवल निर्वाचन कार्यालयका प्रमुख लेखनाथ पौड्यालले बताए।