रूपन्देहीमा ८०७ पदका लागि पाँच हजार ७४ जनाको उम्मेदवारी

बुटवल– आशन्न स्थानीय तह निर्वाचनमा रुपन्देहीमा सबै पदमा गरी ५ हजारभन्दा बढीको उम्मेदवारी परेको छ। जिल्ला निर्वाचन कार्यालय रुपन्देहीका अनुसार प्रमुख–उपप्रमुख, अध्यक्ष–उपाध्यक्ष, वडाध्यक्ष तथा सदस्यमा गरी कुल ५ हजार ७४ जनाको उम्मेदवारी परेको हो।

यी मध्येबाट सबै पदमा गरी ८ सय ७ जना निर्वाचित हुनेछन्। जिल्लाका १६ वटै पालिकामा रहेका निर्वाचन अधिकृतको कार्यालयमा आइतबार र सोमबार मनोनयन दर्ता भएको थियो। राजनीतिक दलसँगै सबैजसो पालिकामा स्वतन्त्र उम्मेदवारले पनि मनोनयन दर्ता गरेका छन्।

वैशाख ३० गते हुने निर्वाचनबाट जिल्लाका १६ पालिकामा एक–एक जना प्रमुख–अध्यक्ष, एक–एक जना उपप्रमुख–उपाध्यक्ष र १ सय ५५ जना वडाध्यक्ष चयन हुनेछन्। त्यस्तै, १ सय ५५ वडामा ६ सय २० जना वडा सदस्य निर्वाचित हुनेछन् ।

१६ पालिकाको प्रमुख–अध्यक्षमा २ सय १६ जनाको उम्मेदवारी परेको निर्वाचन कार्यालयले जनाएको छ। यस्तै, उपप्रमुख–उपाध्यक्षमा १ सय ७२ जनाको उम्मेदवारी परेको छ। रुपन्देहीमा कुल ६ लाख ३२ हजार ३६० मतदाता छन्।

यसमा पुरुष ३ लाख २३ हजार ७७८, महिला ८ लाख ८ हजार ५७४ र अन्य ८ जना छन्। २०८ मतदान स्थल छन् भने ७०० सय मतदान केन्द्र छन्।