अन्तर्राष्ट्रिय फुटबलबाट संन्यास लिने इटालियन कप्तान केलिनीको घोषणा

काठमाडौं– इटालियन भेट्रान डिफेन्डर तथा कप्तान जर्जियो केलिनिले अन्तर्राष्ट्रिय फुटबलबाट संन्यास लिने घोषणा गरेका छन्। आगामी जुन १ मा युरोपियन च्याम्पियन इटाली तथा कोपा अमेरिका च्याम्पियन अर्जेन्टिनाको खेलपछि उनले संन्यास लिने बताएका छन्।

सोमबार राति सिरिʻएʼ मा युभेन्टसले ससुलो माथि २–१ को जितसँगै खेलपछि आफूले अन्तराष्ट्रिय फुटबलबाट संन्यास लिने बाताएका हुन्। केलिनिले भने, ʻयदि म ठिक छु भने म खेल्नेछु र राष्ट्रिय टोलीलाई वेम्ब्लीमा बिदाइ गर्नेछु। अर्जेन्टिनासँगको उत्सुक खेलका साथ राष्ट्रिय टोलीलाई गुडबाई भन्न पाउनु राम्रो हुनेछ। यो खेल राष्ट्रिय टोलीबाट अन्तिम खेल हुनेछ।’

केलिनिको कप्तानीमा इटालीले सन् २०२० को युरो कप जितेको थियो। युरोपको च्याम्पियन बने पनि उनले आफ्नो टिमलाई कतारमा हुने फिफा विश्वकप २०२२ मा भने छनोट गराउन असफल रहे। सन् २००४ मा इटालीको राष्ट्रिय टिममा डेब्यु गरेका उनले इटालीका लागि ११६ खेल खेल्दै ८ गोल गरेका छन्।