मतपत्र छपाइ ८० प्रतिशत सकियो

काठमाडौं– देशभर एकै चरणमा हुन लागेको स्थानीय निर्वाचनका लागि मतपत्र छाप्ने काम ८० प्रतिशत सकिएको निर्वाचन आयोगले जनाएको छ।

सोमबार अपराह्न आयोजित नियमित पत्रकार सम्मेलनमा आयोगका प्रवक्ता शालिग्राम शर्मा पौडेलले आजसम्ममा ६३ जिल्लाका लागि १ करोड ५४ लाख ८३ हजार मतपत्र छापिसकेको जानकारी दिए।  

बाँकी जिल्लाको लागि मतपत्र छापिने क्रममा रहेको उनले बताए। निर्वाचनका लागि १ करोड ९४ लाख मतपत्र आवश्यक पर्ने अनुमान आयोगको छ।

आयोगको कार्यतालिकाअनुसार आज उम्मेदवारी मनोनयन सम्पन्न भएपछि भोलि मंगलबार उम्मेदवारको विरोधमा उजुरी दिने समय तोकिएको छ। आज दिउँसो दुई बजेसम्मको विवरणअनुसार २३ हजार ५ सय १७ मनोनयन दर्ता भएको छ। दर्ता भएको मनोनयनमाथि रुजु गर्ने क्रम जारी रहेको आयोगले जनाएको छ। 

वैशाख १६ गते उम्मेदवारले नाम फिर्ता लिने र उम्मेदवारको अन्तिम नामावली प्रकाशन गर्ने कार्यतालिका छ। वैशाख १७ गते उम्मेदवारलाई निर्वाचन चिन्ह प्रदान गर्ने तय भएको छ। यी सबै काम निर्वाचन अधिकृतको कार्यलयमा हुनेछ।

सबै जिल्लामा निर्वाचन सामग्री पठाउने तयारी पूरा भएको र वैशाख १३ गतेदेखि मतपत्र ढुवानी सुरु गर्ने तयारी भइरहेको आयोगले जनाएको छ।