३५ हजारभन्दा बढी पदका लागि पहिलो दिन ३ हजार ५६ जनाको उम्मेदवारी दर्ता

काठमाडौं- वैशाख ३० गते हुने स्थानीय तहको निर्वाचनका लागि उम्मेदवारी मनोनय गर्ने पहिलो दिन आइतबार देशभर तीन हजार ५६ जनाले मनोनयन दर्ता गरेका छन्। ३५ हजार २२१ पदको लागि हुने निर्वाचनमा आइतबार अधिकांश साना दल र स्वतन्त्र उम्मेदवारहरुले उम्मेदवारी दर्ता गराएका छन्। 

निर्वाचन आयोगका अनुसार महानगर, उपमहानगर तथा नगरपालिका प्रमुखमा २१८, उपप्रमुखमा १०२, गाउँपालिका अध्यक्षमा १७२, उपाध्यक्षमा ७५, वडाध्यक्षमा ९२८, वडा सदस्यमा ८७७, महिला सदस्यमा ३९६, दलित महिला सदस्यमा २८८ जनाको मनोनयन दर्ता भएको आयोगले जनाएको छ।

ठूला राजनीतिक दलहरुले उम्मेदवार टुंगो लगाउन नसक्दा आइतबार उम्मेदवारी दर्ता गराउन सकस परेको हो।

आयोगले सोमबार पनि बिहान १० देखि ५ बजेसम्म उम्मेदवारी दर्ता गर्नसक्ने समय निर्धारण गरेको छ। निर्वाचन आयोगका अनुसार आइतबार काठमाडौं महानगरपालिकामा प्रमुख पदमा १७ जना र उपमेयरमा १६ जनाको उम्मेदवारी परेको छ।