सम्भव भएसम्म सबै तहमा तालमेल हुन्छ : प्रचण्ड

काठमाडौं- नेकपा माओवादी केन्द्रका अध्यक्ष पुष्पकमल दाहाल प्रचण्डले वैशाख ३० गते नै स्थानीय तहको निर्वाचन सम्पन्न हुने बताएका छन्। धनगढीमा सञ्चारकर्मीसँगको कुराकानीमा उनले सरकार र निर्वाचन आयोग ३० गते नै चुनाव गराउन प्रतिवद्ध रहेको बताएका हुन्।

उनले गठबन्धनका बीच ६ महानगर र ११ उपमहानगरमा तालमेल गरेर जाने कुरामा सहमति भइसकेको भन्दै अब सोहीअनुरुप अघि बढ्न देशभरका नेता तथा कार्यकर्तालाई आग्रह गरेका छन्।

प्रचण्डले गठबन्धका बीच महानगर र उपमहानगर मात्र नभएर सम्भव भएसम्म सबै स्थानीय तहमा तालमेल गरेर जाने विषयमा पनि सहमति बनेको दाबी गरे। बुधबार सार्वजनिक गरिएको संयुक्त वक्तव्यमा पनि उक्त कुरा उल्लेख रहेको प्रचण्डले बताएका छन्।

‘हामीले सम्भव भएसम्म सबै स्थानीय तहमा तालमेल गरेर जाने निर्णय गरेका छौं। हिजोको वक्तव्यमा पनि तालमेलमा जोड दिइएको उल्लेख गरेका छौं। गठबन्धनको मर्म र भावनालाई आत्मसात गर्दै चुनावका तालमेल गरेर जानेछौं। यदी कुनै ठाउँमा हुन सकेन भने पनि स्वच्छ प्रतिष्पर्धाको आधारमा चुनावमा जानेछौं। त्यो समस्या परेमात्र हो नत्र सम्भव भएसम्म तालमेल गरेर नै जान्छौं’, प्रचण्डले भने।