नेकपा (एस) एक्लै पनि चुनाव लड्न तयार

काठमाडौं– नेकपा (एकीकृत समाजवादी)ले अहिलेको गठबन्धनलाई संसदीय चुनावसम्म लैजाने बताएको छ।

मंगलबार स्थानीय तहको चुनावी घोषणापत्र सार्वजनिक गर्दै उसले तर आफ्नो इमान्दारितालाई कमजोरी ठानिए एक्लै भए पनि निर्वाचन लड्न तयार रहेको उल्लेख गरेको छ।

घोषणापत्र सार्वजनिक कार्यक्रममा पार्टी अध्यक्ष माधवकुमार नेपालले ‘आकाशमा प्रतिगमनको कालो छाया पुनः आउन सक्ने सम्भावनाका कारण गठबन्धनमा जोड दिइरहेको बताए।

पहिलोपटक चुनावी मैदानमा उत्रिन लागेको नेकपा (एस)ले घोषणापत्रमा माधवकुमार नेपाल नेतृत्वको सरकारले गरेका काम, २०५१ सालमा एमालेको नौ महिने सरकारले गरेका आफ्नो गाउँ आफैं बनाऔंलगायत कार्यक्रम पनि समावेश गरिएको छ। 

पुष्पलाल लोकमार्गको सुरुवात

निःशुल्क खानेपानी, सुखी जिन्दगानीको नारा लिएको पार्टीले घोषणापत्रमा प्रत्येक घरपरिवारलाई मासिक २ सय युनिट बिजुली निःशुल्क उपलब्ध गराउनेदेखि भ्रष्टाचार निर्मूल पार्नेसम्मका विषय समेटेको छ।