चुनावी तालमेलको मोडालिटी बनाउन सत्तारुढ गठबन्धनको बैठक सुरु

काठमाडौं- स्थानीय तहको निर्वाचनका लागि तालमेलको मोडालिटी बनाउने सत्तारुढ गठबन्धनमा रहेका दलका शीर्ष नेताहरुको बैठक सुरु भएको छ। प्रधानमन्त्रीको सरकारी निवास बालुवाटारमा मंगलबार बेलुका सत्तारुढ दलका शीर्ष नेताहरुको बैठक सुरु भएको हो। 

स्थानीय तहको निर्वाचनमा तालमेल गर्ने स्थानीय कमिटीलाई अपील गरेको एक दिनपछि प्रधानमन्त्रीको सरकारी निवास बालुवाटारमा पाँच दलीय गठबन्धनको बैठक बसेको हो। 

बैठकमा प्रधानमन्त्री एवम् कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधव नेपाल र जसपा अध्यक्ष उपेन्द्र यादवसहित सहभागी छन्। बैठकमा कांग्रेस वरिष्ठ नेता रामचन्द्र पौडेलसहित अन्य नेताहरु पनि सहभागी छन्। 

यसअघि सत्तारुढ गठबन्धनबीच ६ वटा महानगरका विषयमा छलफल गरेको थियो। जसमा काठमाडौं, ललितपुर र विराटनगर नेपाली कांग्रेस, चितवनमा माओवादी केन्द्र, पोखरामा एकीकृत जनता समाजवादी र विरगन्ज महानगरमा जनता समाजवादीका उम्मेदवारहरु उठाउने सहमति भएको बताइएको थियो। तर, कांग्रेस प्रवक्ता डा. प्रकाशशरण महतले भने छलफल भए पनि औपचारिक टुंगो लाग्‍न बाँकी रहेको बताएका थिए।