वर्षाका कारण नेपालले  नेदरल्यान्ड्ससँग ट्रफी बाँड्यो

लर्डस- नेपाल र नेदरल्यान्ड्सले त्रिकोणात्मक सिरिजको ट्रफी बाँडेका छन् । 

बेलायतको लर्डसमा भएको अन्तिम खेल वर्षाका कारण रद्ध भएपछि नेपाल नेदरल्यान्ड्ससँग ट्रफी बाँड्न बाध्य भएको हो । वर्षा नरोकिने स्थिति देखा परेपछि आयोजकले टी–२० इन्टरनेसनल मान्यतासमेत पाएका यी दुई देशलाई संयुक्त विजेता घोषणा गर्दै ट्रफी बाँडेको हो  । 

आइतबार राति भएका खेलमा दुवै टिमले एक-एक खेल जितेका थिए । मेरिलिबोन क्रिकेट क्लब (एमसीसी) लाई नेपाल र नेदरल्यान्ड्सले पराजित गरेका हुन् । तर, नेपाल र नेदरल्यान्ड्सको खेल भने वर्षाले प्रभावित भएपछि दुवै टिमलाई संयुक्त विजेता घोषणा गरिएको हो । 

लर्डसमा टस हारी पहिला ब्याटिङ शुरु गरेको नेदरल्यान्ड्सले ४ विकेटको क्षतिमा १६४ रन बनाउँदा पानी पर्न शुरु गरेको थियो । १६ दशमलव ४ ओभरमा पानी पर्न शुरु गरेपछि स्थगित भएको खेल पुनः शुरु हुन सकेन ।